ગુજરાતના શિક્ષણ ક્ષેત્રે ઈતિહાસ સર્જાયો: મુખ્યમંત્રીએ એક ક્લિકમાં 13 લાખ વિદ્યાર્થીઓના ખાતામાં ₹724 કરોડ ટ્રાન્સફર કર્યા

ગુજરાત રાજ્યએ ફરી એકવાર પુરવાર કરી દીધું છે કે ડિજિટલ ગવર્નન્સ કેવી રીતે સીધા લોકોના જીવનમાં સકારાત્મક પરિવર્તન લાવી શકે છે. રાજ્યના મુખ્યમંત્રી શ્રી ભૂપેન્દ્ર પટેલે ગાંધીનગરથી વિડીયો કોન્ફરન્સ દ્વારા રાજ્યના 13 લાખથી વધુ વિદ્યાર્થીઓના ખાતામાં કુલ ₹724 કરોડની ડાયરેક્ટ બેનિફિટ ટ્રાન્સફર (DBT) કરી છે.

આ સહાય ચાર મુખ્ય શિક્ષણ આધારિત યોજનાઓ – નમો લક્ષ્મી યોજના, નમો સરસ્વતી વિજ્ઞાન સાધના યોજના, મુખ્યમંત્રી જ્ઞાન સાધના મેરીટ સ્કોલરશિપ યોજના અને મુખ્યમંત્રી જ્ઞાનસેતુ મેરીટ સ્કોલરશિપ યોજના હેઠળ આપવામાં આવી છે.

આ કાર્યક્રમ એ માત્ર આર્થિક સહાયનું વિતરણ નથી, પણ ડિજિટલ ઈન્ડિયા, નારીશક્તિ અને યુવા વિકાસના વિઝન તરફ રાજ્યનું મહત્વપૂર્ણ પગલું છે.

 નમો લક્ષ્મી યોજના: કન્યાઓ માટે નવી આશાઓ
રાજ્યમાં છાત્રીઓના ડ્રોપઆઉટ રેટને ઘટાડવા અને કિશોરી વયમાં શિક્ષણ સાથે પોષણ અને સશક્તિકરણ સુનિશ્ચિત કરવા માટે નમો લક્ષ્મી યોજના અમલમાં મૂકી છે.

• ધોરણ 9 અને 10 માટે વાર્ષિક ₹10,000
• ધોરણ 11 અને 12 માટે વાર્ષિક ₹15,000 સહાય આપવામાં આવે છે.
•  આ વર્ષે: 10.83 લાખ છાત્રીઓના ખાતામાં કુલ ₹600 કરોડની સહાય સીધા DBT દ્વારા ટ્રાન્સફર કરાઈ.

 અસર: રાજ્યમાં માધ્યમિક શાળાઓમાં છાત્રીઓના દાખલામાં 16%નો નોંધપાત્ર વધારો થયો છે.

નમો સરસ્વતી વિજ્ઞાન સાધના યોજના: ટેકનોલોજી તરફનું કાર્યબળ તૈયાર
વિજ્ઞાન પ્રવાહમાં વધુ વિદ્યાર્થીઓ જોડાય અને ગુજરાતનું ટેકનોલોજી, સેમિકંડક્ટર અને ગ્રીન એનર્જી ક્ષેત્રે ભવિષ્ય તૈયાર થાય એ હેતુથી આ યોજના શરૂ કરાઈ છે.

• ધો.11-12ના વિજ્ઞાન પ્રવાહના વિદ્યાર્થીઓ માટે 2 વર્ષ માટે કુલ ₹25,000ની સહાય
•  આ વર્ષે: 1.53 લાખ વિદ્યાર્થીઓને ₹52 કરોડની સહાય આપી.

 અસર: વિજ્ઞાન પ્રવાહમાં દાખલાની સંખ્યામાં 11%નો વધારો થયો છે, જે રાજ્યના ટેકનિકલ ભવિષ્ય માટે આશાસ્પદ છે.

જ્ઞાન સાધના મેરીટ સ્કોલરશિપ યોજના: ગ્રામીણ અને સરકારી શાળાના તેજસ્વી વિદ્યાર્થીઓ માટે આશાની કિરણ
ધો.1 થી 8 સુધી સરકારી અથવા અનુદાનિત શાળામાં અભ્યાસ કરેલા વિદ્યાર્થીઓ અને RTE અંતર્ગત ભણેલા વિદ્યાર્થીઓ માટે

•  આ વર્ષે: 50,000 વિદ્યાર્થીઓને ₹41 કરોડની સહાય
•  આ યોજના વિદ્યાર્થીઓને સ્પર્ધાત્મક અભ્યાસ માટે સક્ષમ બનાવે છે અને તેમની પ્રતિભાને ઓળખી તેમને આગળ ધપાવવાનો પ્રયાસ કરે છે.

 જ્ઞાનસેતુ મેરીટ સ્કોલરશિપ યોજના: અભ્યાસનો સતત પુલ
ધો.1 થી 5 સુધી અભ્યાસ કર્યા બાદ ધો.6માં પ્રવેશ લેનારા તેજસ્વી વિદ્યાર્થીઓ માટે

•  આ વર્ષે: 60,000 વિદ્યાર્થીઓને ₹31 કરોડની સહાય DBTથી ટ્રાન્સફર
• આ યોજના વિદ્યાર્થીને ધોરણ 6થી ધોરણ 12 સુધી સતત શિક્ષણ મળે અને વચ્ચે છૂટી ન પડે તે હેતુ સાથે કાર્યરત છે.

 એક નવો મોડેલ: પારદર્શક, ટેકનોલોજી આધારિત શાસન
રાજ્ય સરકારે ડિજિટલ ગવર્નન્સનો જે નવો મોડેલ ઉભો કર્યો છે તેમાં લાભાર્થી સુધી સીધો લાભ પહોંચે છે – કોઈ મધ્યસ્થી વિના, કોઈ વિલંબ વિના.

આ શ્રેણીબદ્ધ યોજના અંતર્ગત અત્યાર સુધી રાજ્યના વિદ્યાર્થીઓને કુલ ₹1318 કરોડથી વધુની સહાય મળી ચૂકી છે – જે ગુજરાતના શિક્ષણ ઇતિહાસમાં મહત્વપૂર્ણ સિદ્ધિ છે.

 આર્થિક સહાયથી આત્મવિશ્વાસ સુધીનો સફર
આ યોજનાઓ એ ખાલી પૈસા આપવાના હેતુથી નથી બનાવવામાં આવી, પણ વિદ્યાર્થીઓમાં આત્મવિશ્વાસ ઊભો થાય, તેઓ પોતાની આવકશ્રેણીમાંથી ઊંચા સપનાઓ જોઈ શકે એ માટે છે.

• વિદ્યાર્થીનીઓમાં હાજરી વધી
• વિજ્ઞાન પ્રવાહ તરફ વલણ વધ્યું
• સરકારી શાળાના તેજસ્વી વિદ્યાર્થીઓને માન્યતા મળી
• શિક્ષણમાં ગતિ અને ગુણવત્તા બંનેમાં સુધારો